Produktuen Pasaporte Digitala ez da aukera bat soilik: ekonomia erresilienteago, digitalizatuago, konektatuago eta zirkular baterako pasaportea da.
Produktuen Pasaporte Digitala (DPP) industria europarraren eraldaketa jasangarri eta adimendunaren katalizatzaile nagusietako bat izango da. Produktuen Diseinu Ekologikorako Araudia (ESPR) eta bateriak nahiz eraikuntzako produktuak bezalako beste araudi batzuk bultzatuta, pasaporte digital honek produktu baten bizi-zikloan zehar informazio giltzarria bilduko du: osaera, jatorria, ingurumen-inpaktua, birziklagarritasuna eta desmuntatzeko jarraibideak, besteak beste. Azken batean, produktuen jasangarritasunari buruzko informazioaren gardentasuna bermatu nahi du balio-kate osoan, kontsumitzaile, bezero eta interesa duten beste eragileek erabaki informatuak har ditzaten lagunduz.
DPP-ak produktu baten bizi-zikloan parte hartzen duten eragile guztientzat datu esanguratsuetara sartzeko aukera demokratizatzen du: produktua merkatura ateratzen duten eragile ekonomikoentzat (fabrikante, inportatzaile, banatzaile eta lineako merkatuen hornitzaileak), baita azken kontsumitzaileentzat, agintari, birziklatzaile eta hondakin-kudeatzaileentzat ere.
Bere ezarpena derrigorrezkoa izango da produktu multzo jakin baterako. Europako Batasunak 2025–2030erako argitaratutako lehen lan-planak azken produktuak barne hartzen ditu, hala nola ehungintzakoak, altzariak, pneumatikoak eta koltxoiak, eta bitarteko produktuak, hala nola burdina, altzairua eta aluminioa. Gainera, baterientzat 2027rako data ezarri da, eta eraikuntzako produktuentzat 2028rako.
Produktuen Pasaporte Digitalaren erronkak
Produktuen Pasaporte Digitalaren (DPP) erronka nagusietako bat da hornikuntza-kate osoan beharrezkoa eta eskatutakoa den informazio guztia biltzea. Horrek produktua erabiltzeko eta funtzionatzeko datuak ere barne hartu ditzake, hala zehazten bada. Erronka honi aurre egiteko, CEN eta CENELEC erakundeek estandarrak garatzen ari dira interoperabilitateari, biltegiratzeari, API-ei, sarbideari eta baimenari buruzko jarraibideak ezartzeko. Horrela, produktuen pasaporte digitalak sortzea eta horietara sartzea errazagoa izango da.
Iván Álvarez
Berrikuntzaren Arduraduna LKS Next-en
