LKS Next Business Consulting, LKS Next taldeko enpresa-aholkularitzan espezializatutako unitateak, aliantza komertziala sinatu du Kataluniako Mirihi enpresarekin. Akordio honen helburua da Kataluniako bezeroen Operazioen Erresilientzia, Eraginkortasuna eta Iraunkortasuna hobetuko dituzten proiektuak bultzatzea. Zehazki, bi erakundeen arteko aliantza lehen fase batean Osasun eta Edertasun jardueran (Health&Beauty) zentratuko da, arlo honetan Mirihi-k espezializazio handia duelako.
LKS Next Business Consulting eta Mirihi-ren arteko aliantzak bi erakundeen espezializazio-eremuetako ezagutza uztartuko du, Katalunian hazkunde handiko eta balio erantsi handiko sektoreetan negozio-aukera berriak sortzeko helburuarekin. Lehen fase honetan, aliantzak Kataluniako enpresa eta erakundeen garapena sustatuko du Osasun Integrala (Farmazia, Bioteknologia, Osasun eta Osagarri Nutrizioak) eta Edertasun eta Norberaren Zaintza (Ongizatea eta Kosmetika) sektoreetan.
Helburua da bezeroen Operazioen Erresilientzia, Eraginkortasuna eta Iraunkortasuna hobetzen duten proiektuetan arreta jartzea, batez ere erronka global kritikoekin lotuta daudenetan, eta oinarri teknologikoa duten irtenbide disruptiboak eskatzen dituztenetan. Aliantza honen arduradunek jada hainbat eremu identifikatu dituzte: Estrategia Prospektiboa, Arriskuen Kudeaketa, Erosketak eta Hornikuntza Katea, Finantza Kudeaketa, Talentua Erakarri eta Kudeatzea edo Industria Aholkularitza.
LKS Next euskal enpresa-talde bat da eta bere fakturazioaren dimentsioak (73,5 milioi euroko negozioa 2024an) Estatuko zortzigarren aholkularitza-talde gisa kokatzen du, eta lehenengoa euskal kapitalarekin. Aldi berean, erakunde hau Mondragon Taldearen barruan dago, Estatuko hamar industria-talde garrantzitsuenetako bat eta mundu mailan erreferente den enpresa-eredua; 150 herrialdetan dago presente, 70.000 profesional baino gehiago eta 11.000 milioi euroko fakturazioa du.
Bestalde, Kataluniako Mirihi BCorp boutique-enpresa bat da, osasun-teknologiak eta produktuak banatzeko eta aholkularitza-zerbitzuak eskaintzeko. Osasun eta Edertasun sektoreetan ezagutza handia du, Katalunian presente dago eta sektoreak aurre egin behar dien erronkak ondo ezagutzen ditu. Lurraldearen eta sektorearen ezagutza hori izan da aliantza finkatzeko baloratua.
LKS Next-ek posizionamendu bereizia du Estatuko Industria sektorean, eta ibilbide luzea du Osasun eta Gizarte-osasun arloan, hainbat erreferentzia eta arrakasta-kasu esanguratsurekin: autonomia-erkidegoetako Osasun eta Minbizi Planak, Covid-19ari erantzuteko ebaluazioak, erakunde sanitarioen Plan Estrategikoak, Genetika edo Osasun I+G+b proiektuak eta farmazia-enpresen kudeaketa hobetzeko proiektuak. LKS Next-en balio bereizgarria bere esperientzia zabala, diziplina anitzeko taldea, bere irtenbideen berrikuntza teknologikoa eta ikuspegi integratzailea dira.
Gonzalo Fornos, LKS Next-eko Business Consulting dibisioko zuzendariak, adierazi duenez, “orain sinatzen dugun aliantzak gure operazioak modu antolatuan eta sektore-fokua mantenduz hedatzea eta sendotzea ahalbidetuko du”. Bere iritziz, “datozen hilabeteetan soluzio berritzaileen aurkezpen-jarduera bizia garatuko dugu eta kolaboratzaileekin kontaktuak egingo ditugu, guztia Mirihi gure aliatu komertzialarekin batera”.
Bestalde, Cristian Lienas, Bartzelonako enpresako CEOak, nabarmendu du LKS Next-ekin aliantza “bezeroen erronkak hainbat kolaboratzaile potentzialen gaitasunekin alderatu ostean egin dela”. Cristian Lienas-en hitzetan, “LKS Next-ek gure bezero askori erronka horiei aurre egiten laguntzeko ezagutza, gaitasunak eta erreferentzia egokiak eskaintzen ditu”.
